Янгиликлар
26
Аҳоли учун яна бир қулайлик
Оққўрғон туманида аҳолига ҳуқуқий хизмат кўрсатишни янада такомиллаштириш мақсадида туман ФҲДЁ бўлимининг янги кўркам биноси қурилиб, фойдаланишга топширилди. Барча қулайликларга эга, замонавий жиҳозланган муҳташам иморатнинг тантанали очилиш маросими юртимиздаги байрам шодиёналарига уланиб кетди.
— ФҲДЁ бўлими туман марказидан узоқда, эски бинода жойлашганлиги учун ҳам кўпгина ноқулайликлар туғдирар эди, — дейди маҳалла фуқаролар йиғини раиси Жонузоқ Искандаров. — Янги бино кўзимизни қувонтирибгина қолмай, нафақат ёшлар, балки биз кексаларга ҳам ҳар томонлама ёрдам кўрсатувчи ҳуқуқий маслаҳатхона бўлиши шубҳасиз.
Дарҳақиқат, янги бинода никоҳ маросимлари зали, ёш оилалар мактаби, “Соғлом она — соғлом бола”, “Келин-куёвларга маслаҳат” хоналари
мавжуд бўлиб, ФҲДЁ бўлими ходимлари ва тегишли мутахассислар бу ерга ташриф буюрувчиларга беминнат ҳуқуқий ёрдам ва маслаҳат беришга шай. Айтиш жоизки, Тошкент вилояти адлия тизимидаги барча ФҲДЁ бўлими ва давлат нотариал идоралари бинолари замон талабларига мос тўлиқ таъмирланиб, лозим ҳолларда янги бинолар билан таъминланмоқда.
Ойбек Қаюмов, Тошкент вилоят адлия бошқармаси масъул ходими