Янгиликлар
ЭРКИН ФАОЛИЯТГА РАҒБАТ
Тошкент Давлат Аграр университетида “Ўзбекистон Республикаси айрим қонун ҳужжатларига хусусий мулкни, тадбиркорлик субъектларини ишончли ҳимоя қилишни янада кучайтиришга, уларни жадал ривожлантириш йўлидаги тўсиқларни баратараф этишга қаратилган ўзгартириш ва қўшимчалар киритиш тўғрисида”ги Ўзбекистон Республикасининг 2015 йил 20 августдаги Қонуни мазмун-моҳиятини тушунтириш мақсадида видеоконференция ўтказилди.
Видеоконференцияда давлат бошқаруви органлари, ҳуқуқни муҳофаза қилувчи ва суд идораларининг масъул ходимлари иштирок этди.
Ўтказилган видеоконференцияда тадбиркорлик фаолиятининг кафолатли ҳимоясини таъминлашга қаратилган мазкур қонун юртимиз ободлиги, турмушимиз фаровонлигининг асосий омилларидан бири бўлиб, бу соҳадаги ислоҳотларни янги босқичга кўтаради,- дея таъкидланди анжуманда. Уни қабул қилишдан кўзланган асосий мақсад - бизнес субъектларининг ишончли ҳимоясини таъмин этиш баробарида уларни жадал ривожлантириш, иқтисодиётда давлат иштирокини камайтириш, ялпи ички маҳсулотда хусусий мулкнинг, жумладан чет эл капитали иштирокидаги улушини изчил ошириш билан боғлиқ қонунчиликни янада такомиллаштиришдан иборатлиги ҳақида гапириб ўтилди.
Шунингдек, мазкур ҳужжат билан амалдаги 10 та кодекс ва 33 та қонунга тадбиркорликни жадал ривожлантириш йўлидаги тўсиқларни бартараф этиш, хусусий сектор фаолиятига ноқонуний аралашганлик учун мансабдор шахсларнинг жавобгарлигини кучайтириш, соҳага оид қонунчиликни янада либераллаштиришга қаратилган ўзгартиш ва қўшимчалар киритилганлиги хусусида гапирилди.
Хусусан, жиноят кодексига тадбиркорлик фаолиятига тўсқинлик қилиш, қонунга хилоф равишда аралашиш билан боғлиқ жиноятлар ҳамда хўжалик юритувчи субъектларнинг ҳуқуқлари ва қонуний манфаатларига тажовуз қилувчи бошқа жиноятлар деб номланувчи янги боб киритилди. Аниқроқ айтганда ушбу кодекс хусусий мулк ҳуқуқини бузиш, назорат органлари ходимларининг хўжалик субъектларнинг молиявий-хўжалик фаолиятини текшириш ва тафтиш қилиш тартибига риоя этмаслик, бизнес вакилларининг фаолиятини ёки уларнинг банклардаги ҳисобварақалари бўйича операцияларини қонунга хилоф равишда тўхтатиб туриш, имтиёзлар ва преференцияларни қўллашни ғайриқонуний равишда рад этиш, хусусий сектор вакилларини ҳомийликка ва бошқа тадбирларга жалб этиш учун жавобгарлигини кучайтиришга қаратилган тегишли моддалар билан тўлдирилди.
Айни вақтда либераллаштириш доирасида савдо-сотиқ қоидалари, савдо ва воситачилик фаолияти соҳасидаги ҳуқуқбузарликлар жиноий юрисдикциядан маъмурий юрисдикцияга ўтказилди.
Видеоконференцияда мутахассислар янги қонуннинг мазмун-моҳияти, унинг аҳамияти тўғрисида батафсил ахборот бердилар. Шунингдек уни аниқ ва бир хилда қўллаш бўйича амалиёт таҳлилидан келиб чиқиб тегишли тавсиялар ишлаб чиқилди.
Эркин суҳбат асносида иштирокчилар ўзларини қизиқтирган саволлар бўйича керакли маълумот олдилар.