Янгиликлар

Меҳнатга яраша рағбат бўлмаган жойда унумдорлик бўлмайди

Тошкент вилоят адлия бошқармаси томонидан бошқарма марказий аппарати ва туман (шаҳар) адлия бўлимларига 2020 йил I чорак давомида жисмоний ва юридик шахслар томонидан келиб тушган 2996 та мурожаат ўрганилди. Мурожаатлар таҳлили шуни кўрсатмоқдаки, уларнинг аксарияти меҳнат низолари, ижтимоий ҳимоя, ер ва уй-жой масалаларидир.

Шунингдек, такрорий мурожаатларнинг олдини олиш мақсадида муаллиф иштирокида мурожаатларни ўз жойида кўриб чиқиш юзасидан амалий чора-тадбирлар амалга оширилди. Фуқароларнинг турли муаммоли масалалари юзасидан қабул қилинган 950 та мурожаат бўйича ҳуқуқий тушунтириш берилди. Бундан ташқари, фуқароларнинг ҳуқуқ ва манфаатларини ҳимоя қилиш мақсадида 7,652 миллиард сўмлик 410 та даъво аризалари киритилди.

Жумладан, Оҳангарон туманида яшовчи 10 нафар фуқаро ”Оҳангарон Шифер” АЖ томонидан иш ҳақлари ўз вақтида тўланмай келинаётганлигидан норози бўлиб, Тошкент вилоят адлия бошқармасига мурожаат қилишди. Инсон ҳуқуқларини ҳимоя қилиш бўлими ходимлари томонидан ўрганиш жараёнида “Оҳангарон Шифер” АЖ томонидан 10 нафар фуқароларга 2 ойлик иш ҳақлари тўланмасдан келинаётганлиги аниқланди. Фуқаролик ишлари бўйича Оҳангарон туманлараро судига ариза киритилди. Натижада фуқаролар фойдасига иш ҳақлари ундирилиши белгиланди.

Бундан ташқари, мурожаатларни кўриб чиқиш натижасида 138 та тақдимнома, 8 та жиноий, 31 та маъмурий жавобгарликка тортиш юзасидан таклиф берилди. Қўлланилган таъсир чоралари натижасида 43 нафар шахс интизомий, 1 нафар шахс жиноий, 15 нафар шахс маъмурий жавобгарликка тортилди.

Сайёр қабуллар давомида қабул қилинган 939 та мурожаатнинг 521 таси қаноатлантирилди, 418 та мурожаат бўйича ҳуқуқий тушунтириш берилди.

                                                                                                                                                                                                                                                                                                                                                                        Хушнуд Каримов,

                                                                                                                                                                                                                                                                                             Тошкент вилоят адлия бошқармаси бошлиғи ўринбосари