Янгиликлар

Maʼmuriy javobgarlik toʻgʻrisidagi kodeksiga oʻzgartirish kiritildi.

Maʼmuriy javobgarlik toʻgʻrisidagi kodeksiga oʻzgartirish kiritildi.

                Soʻnggi yillarda mamlakatimizda inson huquqlari va manfaatlarini soʻzsiz taʼminlash hamda faol fuqarolik jamiyatini shakllantirishga qaratilgan islohatlarning ustuvor yoʻnalishlarini mustahkamlashga doir tizimli ishlar olib borilmoqda.

         Mamlakatimizda muayyan yashash joyiga ega boʻlmagan shaxslarni reabilitatsiya qilish orqali ularga huquqiy, ijtimoiy, psixologik, tibbiy va boshqa turdagi yordam koʻrsatishga , shuningdek ularga jamiyatda qabul qilingan xulq-atvor normalari vaqoidalarini singdirishga qaratilgan chora-tadbirlarni amalga oshirishning huquqiy asoslari yaratilgan.

         Shu munosabat bilan joriy yilning 16-dekabrida qabul qilingan Oʻzbekiston Respublikasining 810-sonli qonuniga asosan Maʼmuriy javobgarlik toʻgʻrisidagi kodeksga oʻzgartirish va qoʻshimchalar kiritildi.

Mazkur Qonun bilan Maʼmuriy sud ishlarini yuritish toʻgʻrisidagi kodeksning muayyan yashash joyiga ega boʻlmagan shaxslarni reabilitatsiya markaziga joylashtirish toʻgʻrisidagi iltimosnomalarni koʻrib chiqishga doir normalarini Maʼmuriy javobgarlik toʻgʻrisidagi kodeksga oʻtkazish hamda tegishli ishlarni koʻrib chiqishni maʼmuriy sudlardan jinoyat ishlari boʻyicha tuman, shahar sudlariga oʻtkazish belgilandi.

Unga koʻra, Maʼmuriy javobgarlik toʻgʻrisidagi kodeksga muayyan yashash joyiga ega boʻlmagan shaxsni reabilitatsiya markaziga joylashtirish toʻgʻrisida ish yuritish tartibi kiritildi.

Muayyan yashash joyiga ega boʻlmagan shaxsning reabilitatsiya markaziga joylashtirilishini talab qiluvchi asoslar aniqlanganda, ichki ishlar organi bunday shaxs ichki ishlar organiga keltirilgandan eʼtiboran 48 soatda uni reabilitatsiya markaziga 30 sutkadan koʻp boʻlmagan muddatga joylashtirish toʻgʻrisida sudga iltimosnoma yuborish uchun materiallarni tayyorlashi shart.

Muayyan yashash joyiga ega boʻlmagan shaxsni reabilitatsiya markaziga joylashtirish toʻgʻrisidagi materiallar bunday shaxs aniqlangan yerdagi yoki reabilitatsiya markazi joylashgan yerdagi jinoyat ishlari boʻyicha tuman (shahar) sudiga ichki ishlar organi tomonidan beriladi.

Iltimosnoma taqdim etilgan paytdan eʼtiboran 24 soat ichida sudya tomonidan yopiq sud majlisida yakka tartibda koʻrib chiqiladi.

Yangiyoʻl tumani adliya boʻlimi boshligʻi v.v.b.                            O. Satimov