Янгиликлар

Mehnat qonunchiligida yosh bolali ayollarga qanday kafolatlar belgilangan?

Mehnat qonunchiligida yosh bolali ayollarga qanday kafolatlar belgilangan?

Ushbu savolga javob berish uchun savolni ikki qismga ajratib olishimiz kerak bo‘ladi: 2 yoshga to`lmagan bolasi bor ayollar uchun kafolatlar va 3 yoshga to`lmagan bolasi bor ayollar uchun kafolatlar.

2 yoshga to`lmagan bolasi bor ayollar uchun kafolat va imtiyozlar quyidagilar:

2 yoshga to`lmagan bolasi bor ayollar avvalgi ishini bajarishi mumkin bo`lmagan taqdirda, bolasi ikki yoshga to`lgunga qadar avvalgi ishidagi o`rtacha oylik ish haqi saqlangan holda engilroq yoki noqulay ishlab chiqarish omillarining ta’siridan xoli bo`lgan ishga o`tkaziladi (МК 227-moddasi).

Homiladorlik va tug`ish ta’tili tugaganidan keyin ayolning xohishiga ko`ra, unga bolasi ikki yoshga to`lgunga qadar bolani parvarishlash uchun ta’til berilib, bu davrda qonunchilikda belgilangan tartibda nafaqa to`lanadi. Bola parvarishi bo`yicha nafaqa parvarish qilinayotgan bolalar sonidan va nafaqa oluvchi shaxsning mehnat stajidan qat’iy nazar har oyda: mehnatga haq to`lashning eng kam miqdorining 60 foizi miqdorida to`lanadi. 2022 yil 1 iyundan mehnatga haq to`lashning eng kam miqdori — oyiga 920 000 so`mni tashqil qiladi. Diqqat, bu nafaqa byudjet tashkilotlarida ishlovchi onalarga to`lanmaydi (МК 234-moddasi).

2 yoshga to`lmagan bolasi bor ayollarga, dam olish va ovqatlanish uchun beriladigan tanaffusdan tashqari, bolani ovqatlantirish uchun qo`shimcha tanaffuslar ham beriladi. Bu tanaffuslar kamida har 3 soatda bir marta har biri 30 minutdan kam bo`lmagan muddat bilan beriladi. 2 yoshga to`lmagan ikki va undan ortiq bolasi bo`lgan taqdirda, tanaffusning muddati kamida bir soat qilib belgilanadi (МК 236-moddasi).

3 yoshga to`lmagan bolasi bor ayollar uchun kafolat va imtiyozlar:

2 yoshdan 3 yoshgacha bo`lgan bolani parvarish qilayotgan ayollarga ularning xohishiga ko`ra, har yili 14 kalendar kundan kam bo`lmagan muddat bilan ish haqi saqlanmagan holda muqarrar tartibda ta’til beriladi (МК 150-moddasi).

Homilador ayollar, 3 yoshga to`lmagan bolasi bor ayollar ishga qabul qilinganda dastlabki sinov belgilanmaydi (МК 84-moddasi).

3 yoshga to`lmagan bolalari bor, byudjet hisobidan moliyaviy jihatdan ta’minlanadigan muassasalar va tashkilotlarda ishlayotgan ayollarga ish vaqtining haftasiga 35 soatdan oshmaydigan qisqartirilgan muddati belgilanadi (MK 228-1-modda).

Ayolga, uning xohishiga ko`ra, bolasi 3 yoshga to`lgunga qadar bolani parvarishlash uchun ish haqi saqlanmaydigan qo`shimcha ta’til ham beriladi (MK 234-modda).

Homilador ayollar va 3 yoshga to`lmagan bolasi bor ayollar bilan tuzilgan mehnat shartnomasini ish beruvchining tashabbusi bilan bekor qilishga yo`l qo`yilmaydi, korxonaning butunlay tugatilish hollari bundan mustasno, bunday hollarda mehnat shartnomasi ularni albatta ishga joylashtirish sharti bilan bekor qilinadi (MK 237-modda).