Янгиликлар

Vaqtinchalik yoʻq boʻlgan xodimning vazifalarini bajarganda qay tartibda oylik toʻlanadi?

Vaqtinchalik yoʻq boʻlgan xodimning vazifalarini bajarganda qay tartibda oylik toʻlanadi?

     Vazirlar Mahkamasining 2012-yil 18-oktyabrdagi 297-son qarori bilan tasdiqlangan “Oʻrindoshlik asosida hamda bir necha kasbda va lavozimda ishlash tartibi toʻgʻrisida”gi nizomi 20-bandi uchinchi xatboshiga koʻra bir necha kasbda va lavozimda ishlashga, xizmat koʻrsatish zonasini kengaytirishga, ishlar hajmini koʻpaytirishga shunday kasb va lavozim boʻyicha boʻsh ish oʻrni mavjud boʻlganda yoxud qonun hujjatlarida nazarda tutilgan hollarda xodim tomonidan vaqtinchalik yoʻq boʻlgan xodimning vazifalarini bajarishda yoʻl qoʻyiladi.

     Nizomning 22-bandiga koʻra xodimga boshqa lavozimni vaqtincha yuklash uchun xodimning yozma roziligini olish talab etiladi. Bundan koʻrinib turibdiki, xodimga qoʻshimcha vazifa yuklash uchun uning oʻzidan yozma rozilik olinishi kerak.

     23-bandida kasblar va lavozimlarda bir necha kasb va lavozim asosida ishlaganlik, xizmat koʻrsatish zonasini kengaytirganlik, ishlar hajmini koʻpaytirganlik uchun qoʻshimcha haq toʻlanishi belgilangan.

     Lekin ushbu nizom 25-bandiga muvofiq byudjet tashkilotlarida bir necha kasb va lavozimda ishlaganlik, xizmat koʻrsatish zonasini kengaytirganlik, ishlar hajmini koʻpaytirganlik uchun qoʻshimcha haq toʻlash miqdori bir necha kasb va lavozimda ishlanayotgan lavozim boʻyicha maoshning (tarif stavkasining) 50 foizidan ortiq boʻlishi mumkin emas.

      Demak, vaqtinchalik yoʻq boʻlgan xodimning vazifalarini bajarganda bir necha kasb va lavozimda ishlanayotgan lavozim boʻyicha ish haqi miqdorining 50 foizidan koʻp boʻlmagan miqdora haq toʻlash kerak.

Olmaliq shahar Adliya boʻlimi

yuridik xizmat koʻrsatish markazi                

bosh yuriskonsulti                                       Nodirova Klara Farxadovna