Янгиликлар
DAVLAT OLIY TAʻLIM MUASSASALARIGA OʻQISHGA QABUL QILISH BOʻYICHA DAVLAT BUYURTMASI PARAMETRLARI TASDIQLANDI
DAVLAT OLIY TAʻLIM MUASSASALARIGA OʻQISHGA QABUL QILISH BOʻYICHA DAVLAT BUYURTMASI PARAMETRLARI TASDIQLANDI
Prezidentning 19.07.2024-yildagi F-36-son farmoyishi bilan 2024/2025 oʻquv yili uchun davlat oliy taʻlim muassasalariga oʻqishga qabul qilish boʻyicha davlat buyurtmasi parametrlari tasdiqlandi.
Prezidentning 24.05.2024-yildagi "Oliy taʻlim tashkilotlariga oʻqishga qabul qilish va davlat buyurtmasini joylashtirish tizimini takomillashtirish toʻgʻrisida"gi PF-81-son Farmoniga muvofiq bakalavriat taʻlim yoʻnalishlari va magistratura mutaxassisliklari boʻyicha kunduzgi taʻlim shaklida davlat buyurtmasi parametrlarini tasdiqlash tartibi joriy etildi.
2024/2025 oʻquv yilidan boshlab davlat oliy taʻlim muassasalariga qabul imtihonlari "avval test, keyin tanlov" tamoyili asosida oʻtkaziladi.
2024/2025 oʻquv yili uchun davlat oliy oʻquv yurtlariga oʻqishga qabul qilish boʻyicha davlat buyurtmasi parametrlari tasdiqlandi:
● kunduzgi taʻlim shaklida bakalavrlar tayyorlash - 34 838 kishi;
● magistrlar tayyorlash - 9 365 kishi.
Davlat komissiyasiga bir hafta muddatda 2024/2025 oʻquv yili uchun quyidagilarni tasdiqlash topshirildi:
a) bakalavriat taʻlim yoʻnalishlariga qabul qilish boʻyicha:
● oliy taʻlim muassasalari, taʻlim shakllari va tillari kesimida umumiy qabul parametrlari;
● imtiyozlarga ega abituriyentlar uchun qoʻshimcha qabul parametrlari;
● tegishli bakalavriat taʻlim yoʻnalishi boʻyicha oʻtgan oʻquv yilidagi oʻrtacha oʻtish ballini hisobga olgan holda davlat granti va toʻlov-kontrakt asosida oʻqishga qabul qilishning minimal oʻtish balli;
● hududlar, sohalar va tarmoqlarning buyurtmalariga muvofiq kadrlarga boʻlgan ehtiyojini taʻminlash uchun davlat granti asosidagi umumiy qabul parametrlari doirasida maqsadli qabul kvotalari va ushbu kvotalarning tumanlar (shaharlar) kesimida taqsimlanishi;
● taʻlim sohalari (bakalavriat taʻlim yoʻnalishlari) kesimida har bir taʻlim yoʻnalishi boʻyicha umumiy qabul parametrlarida davlat granti kvotasining ulushi;
b) oliy taʻlim muassasalari va taʻlim tillari kesimida davlat granti va toʻlov-kontrakt asosida boʻlingan holda magistratura mutaxassisliklariga qabul parametrlari.
Davlat oliy taʻlim muassasalariga kirish chogʻida toʻplangan ballarga qoʻshimcha ball shaklidagi imtiyozga ega boʻlgan, 2024/2025 oʻquv yili uchun tanlangan taʻlim yoʻnalishi boʻyicha maʻlum oʻtish ballini va undan yuqori ball toʻplagan abituriyentlar toʻplangan ballarga muvofiq ravishda qoʻshimcha kvota doirasida davlat granti yoki toʻlov-kontrakt asosida talabalikka tavsiya etiladi.
Oʻrta Chirchiq tumani yuridik xizmat koʻrsatish markazi bosh yuriskonsulti A.Ibragimov