Янгиликлар

Ishga qabul qilish bosqichlari: Mehnat kodeksining 122-moddasi sharhi

Ishga qabul qilish bosqichlari: Mehnat kodeksining 122-moddasi sharhi

Mehnat munosabatlari har doim rasmiy huquqiy asosga ega bo‘lishi lozim. Ishga qabul qilish jarayoni O‘zbekiston Respublikasi Mehnat kodeksining 122-moddasida belgilangan tartibda amalga oshiriladi. Bu norma xodim va ish beruvchi o‘rtasidagi mehnat munosabatlari qonuniy asosda yo‘lga qo‘yilishini ta’minlaydi va har ikki tomonni himoya qiladi.

O‘zbekiston Respublikasi Mehnat kodeksining 122-moddasiga muvofiq, ishga qabul qilish quyidagi bosqichlarda amalga oshiriladi:

1. Ariza berish

Ishga qabul qilinmoqchi bo‘lgan shaxs ish beruvchiga yozma ariza bilan murojaat qiladi. Bu birinchi rasmiy bosqich hisoblanadi va xodimning ishga bo‘lgan rasmiy istagini bildiradi.

2. Zarur hujjatlarni topshirish

Nomzod quyidagi hujjatlarni taqdim etishi lozim:

·         Shaxsni tasdiqlovchi hujjat (pasport yoki ID-karta);

·         Ma’lumot to‘g‘risidagi hujjat (diplom, attestat va h.k.);

·         Mehnat daftarchasi (agar ilgari ishlagan bo‘lsa);

·         Harbiy hisob hujjati (harbiy majburiyatli shaxslar uchun);

·         Tibbiy ko‘rikdan o‘tganligi to‘g‘risidagi ma’lumotnoma (zarur hollarda);

·         Fotosuratlar (zarur bo‘lsa).

Ish beruvchi ushbu hujjatlarni qonuniy asosda talab qilishi mumkin.

3. Mehnat shartnomasini tuzish

Nomzod ishga qabul qilinayotgan bo‘lsa, u bilan yozma ravishda mehnat shartnomasi tuziladi. Shartnomada quyidagilar ko‘rsatiladi:

·         Xodimning lavozimi;

·         Ish haqi miqdori;

·         Ish joyi va sharoitlari;

·         Ish vaqti, ta’til va boshqa mehnat shartlari;

·         Shartnomaning muddati (muddatsiz yoki belgilangan muddatga).

4. Buyruq chiqarish

Mehnat shartnomasi imzolangach, ish beruvchi buyruq (farmoyish) chiqaradi. Bu hujjat asosida xodim rasmiy ravishda ishga qabul qilingan hisoblanadi.

5. Xodimni ish joyiga tanishtirish

Ish beruvchi yangi xodimni:

·         Ish joyi va lavozimi bilan;

·         Ichki mehnat tartibi, texnika xavfsizligi va yong‘in xavfsizligi qoidalari bilan;

·         Bevosita rahbarlari va jamoasi bilan tanishtiradi.

Bu bosqich xodimning mehnat faoliyatini samarali boshlashi uchun muhim ahamiyatga ega.

Yangiyo‘l shahar adliya bo‘limi

Bosh yuriskonsult: A.Kazimbayev