Янгиликлар
Boquvchi vafot etgan taqdirda ish beruvchining qo‘shimcha xarajatlarni qoplash majburiyati borligidan xabordorsizmi?
Boquvchi vafot etgan taqdirda ish beruvchining qo‘shimcha xarajatlarni qoplash majburiyati borligidan xabordorsizmi?
O‘zbekiston Respublikasi Mehnat kodeksining 332-moddasi xodimning mehnat faoliyati jarayonida mayib bo‘lishi oqibatida vafot etgan hollarda, ish beruvchining moddiy javobgarligini aniq belgilab beradi. Ushbu norma insoniylik, adolat va ijtimoiy javobgarlik tamoyillarini o‘zida mujassam etadi.
Birinchidan, ushbu modda bo‘yicha, agar xodim ishlab yurgan paytda mehnat jarayonida mayib bo‘lib vafot etsa, ish beruvchi dafn marosimi uchun zarur bo‘lgan barcha xarajatlarni o‘z zimmasiga olishi shart. Bunday xarajatlarni bajargan shaxs — odatda qarindosh yoki yaqin kishi — xarajatlar uchun asosli dalillar bilan murojaat qilganda, ularning haqqi to‘liq qoplanadi. Muhimi, bu to‘lovlar umumiy moddiy zarar kompensatsiyasiga kiritilmaydi, ya’ni bu — alohida va mustaqil to‘lov shakli hisoblanadi.
Ikkinchidan, modda doirasida ish beruvchi qo‘shimcha xarajatlarni ham qoplash majburiyatiga ega. Bu xarajatlar orasida:
- marhum jasadini boshqa hududga tashish;
- ish beruvchi da’voni rad etgan taqdirda, bu rad etishga oid nizolarni sud orqali hal qilish bilan bog‘liq xarajatlar;
- advokat, yurist, ekspert va boshqa mutaxassislarga to‘langan xizmat haqlari;
- boshqa zarur sud harajatlari mavjud.
Ushbu moddaning amaliy ahamiyati shundaki, vafot etgan xodimning oilasi yoki yaqinlari moliyaviy zarar bilan yolg‘iz qolmaydi. Ish beruvchi qonuniy ravishda bu xarajatlarni qoplab, o‘z zimmasidagi insoniylik burchini bajarishi shart. Bundan tashqari, agar ish beruvchi kompensatsiya to‘lashdan bosh tortsa, manfaatdor shaxs sudga murojaat qilib, o‘z huquqini tiklashi mumkin.
Yangiyo‘l shahar Adliya bo‘limi
Yuridik xizmat ko‘rsatish markazi
bosh yuriskonsulti: Kazimbayev Abdulaziz