Янгиликлар

Ikki yoshgacha bo‘lgan bola parvarishi bilan band ota-ona (vasiy)ni boshqa ishga o‘tkazish tartibi haqida bilasizmi?

Ikki yoshgacha bo‘lgan bola parvarishi bilan band ota-ona (vasiy)ni boshqa ishga o‘tkazish tartibi haqida bilasizmi?

O‘zbekiston Respublikasining Mehnat kodeksi 395-moddasida ikki yoshga to‘lmagan bola parvarishini amalga oshirayotgan ota-onadan biri yoki vasiy bo‘lgan xodimlarning mehnat huquqlari va ularga yaratiladigan shart-sharoitlar belgilangan. Ushbu norma ijtimoiy himoya va oilaviy majburiyatlarni bajarish imkoniyatini muhofaza qilishga qaratilgan.

Mazkur modda talabiga ko‘ra, agar ota-onadan biri (yoki vasiy) avvalgi ishini sog‘lig‘i, jismoniy holati yoki bola parvarishi bilan bog‘liq sabablarga ko‘ra bajara olmasa, u o‘z arizasiga asosan boshqa ishga o‘tkazilishi mumkin. Bunda yangi ish turi bajarilishi mumkin bo‘lishi kerak va mehnatga haq to‘lash avvalgi ishidagi o‘rtacha ish haqidan kam bo‘lmasligi lozim. Bu xodimning moliyaviy holatini yomonlashtirmaslik va oilaviy barqarorlikni ta’minlashga xizmat qiladi.

Agar ish beruvchining zaxirasida bunday muqobil ish bo‘lmasa, u holda xodim bola ikki yoshga to‘lguniga qadar qonunchilikda belgilangan tartibda bola parvarishi bo‘yicha nafaqa olish huquqiga ega bo‘ladi. Bu esa ota-onaning yoki vasiyning moliyaviy himoyasini ta'minlashni davom ettiradi.

Yakka tartibdagi mehnatga doir nizolar yuzaga kelganda, ish beruvchi bunday xodimni boshqa ishga o‘tkazish imkoni yo‘qligini isbotlashga majbur bo‘ladi. Bu tamoyil mehnat nizolarida xodim manfaatini ustuvor qo‘yishga xizmat qiladi.

Ushbu tartib ijtimoiy adolat va xodimlarning oilaviy mas’uliyatini mehnat faoliyati bilan muvozanatlashtirishda muhim rol o‘ynaydi.

Yangiyo‘l shahar Adliya bo‘limi

Yuridik xizmat ko‘rsatish markazi

rahbari: Ro‘ziyeva Sharofatxon