Янгиликлар

Raqamlashtirish sohasida malakali mutaxassislar tayyorlashga yangi chora-tadbirlar belgilandi

Raqamlashtirish sohasida malakali mutaxassislar tayyorlashga yangi chora-tadbirlar belgilandi

O‘zbekiston Respublikasida raqamli texnologiyalar sohasida malakali kadrlar tayyorlash, yoshlarning zamonaviy bilimlarni egallashini rag‘batlantirish hamda xalqaro mehnat bozorida raqobatbardosh mutaxassislarni yetishtirish maqsadida qo‘shimcha chora-tadbirlar belgilandi.

Unga ko‘ra, 2024-yil 1-martdan boshlab quyidagi yangiliklar joriy etiladi:

Yangi imkoniyatlar va subsidiyalar

• Nodavlat ta’lim tashkilotlari bitiruvchisi IT-xizmatlarni eksport qiluvchi tashkilotga ishga joylashsa, o‘quv markaziga bazaviy hisoblash miqdorining 75 baravarigacha bir martalik subsidiya ajratiladi.

• Agar ishga joylashgan bitiruvchi nogironligi bo‘lgan yosh bo‘lsa, subsidiya miqdori 105 baravargacha etadi.

• Xalqaro IT-sertifikatlarga ega bo‘lgan yoshlarning o‘qish va sertifikat xarajatlarining 60 foizi davlat tomonidan qoplanadi.

• Ingliz tilini B2 yoki undan yuqori darajada biladigan yoshlarning xalqaro IT-sertifikat xarajatlari to‘liq qoplab beriladi.

Davlat xizmatlari – onlayn

Barcha jarayonlar Yagona interaktiv davlat xizmatlari portali orqali amalga oshiriladi. Unda:

• nodavlat ta’lim tashkilotlari o‘quvchilarini ro‘yxatga olish,

• arizalarni ko‘rib chiqish va natijalarni e’lon qilish,

• subsidiyalar va xarajatlarni qoplab berish xizmatlari bepul ko‘rsatiladi.

Jarayonlarning shaffofligi Raqamli texnologiyalar vazirligining maxsus axborot tizimi orqali nazorat qilinadi.

Moliyalashtirish tartibi

• Bitiruvchilar uchun ajratiladigan subsidiya Raqamli texnologiyalarni rivojlantirish jamg‘armasi mablag‘lari hisobidan moliyalashtiriladi.

• Xalqaro IT-sertifikatlar uchun xarajatlarning bir qismini yoki to‘liq qoplash esa Davlat budjeti mablag‘lari hisobidan amalga oshiriladi.

Vazifalar va muddatlar

• Raqamli texnologiyalar vazirligi ikki hafta muddatda talab yuqori bo‘lgan IT-yo‘nalishlar ro‘yxatini tasdiqlaydi va muntazam yangilab boradi.

• Bir oy ichida Yagona portal orqali xizmat ko‘rsatish imkoniyati yaratadi.

• 2025-yil 1-yanvarga qadar dastur samaradorligini o‘rganib, uni boshqa tashkilotlarga ham tatbiq etish bo‘yicha taklif kiritadi.

• Ikki oy ichida vazirlik veb-saytida nodavlat ta’lim tashkilotlarining onlayn reyting tizimi yo‘lga qo‘yiladi.

Hukumatning vazifalari

Vazirlar Mahkamasi bir oy muddatda:

• subsidiya miqdorlarini,

• unga qo‘yiladigan talablarni,

• xalqaro IT-sertifikat xarajatlarini qoplash tartibini,

• mas’ul vakolatli organlarni belgilovchi qaror qabul qiladi.
  
  
  

  Raqamlashtirsh bo'yicha bosh maslahatchi 
  B.Fayzullayev