Янгиликлар

Mehnat huquqida muddatlarni hisoblash tartibi — huquqiy aniqlikning kafolati

Mehnat huquqida muddatlarni hisoblash tartibi — huquqiy aniqlikning kafolati

O‘zbekiston Respublikasi Mehnat kodeksining 9-moddasi mehnat huquqlarini amalga oshirish va majburiyatlarni bajarish bilan bog‘liq muddatlarni hisoblash tartibini belgilaydi. Bu modda mehnat qonunchiligi tizimida huquqiy aniqlikni, barqarorlikni va har bir jarayonning aniq vaqt doirasida kechishini ta’minlashga xizmat qiladi.

Mazkur norma huquqiy amaliyotda alohida ahamiyat kasb etadi. Chunki mehnat munosabatlarida ko‘plab huquq va majburiyatlar ma’lum muddat bilan cheklanadi: ishga tiklash, mehnat da’volarini ko‘rib chiqish, intizomiy jazo muddati, ish haqini to‘lash sanasi va boshqalar. 9-modda ana shu muddatlarni to‘g‘ri hisoblash orqali xodim ham, ish beruvchi ham o‘z manfaatlarini huquqiy me’yorga muvofiq himoya qilish imkoniga ega bo‘ladi.

Modda mazmuniga ko‘ra, muddatlar kalendar sanalar bilan yoki yillar, oylar, haftalar, kunlar, soatlar bilan belgilanadi. Shu bilan birga, agar muddatning oxiri ishlanmaydigan kunga to‘g‘ri kelsa, u holda keyingi birinchi ish kuni muddatning tugash kuni deb hisoblanadi. Bu esa xodimning huquqlarini asossiz tarzda cheklab qo‘yilishidan himoya qiladi va adolatni ta’minlaydi.

Shuningdek, moddada “muddatning boshlanishi belgilangan sanadan keyingi kundan hisoblanadi” degan qoida keltirilgan. Bu tamoyil fuqarolik qonunchiligidagi umumiy qoidalarga uyg‘un bo‘lib, mehnat huquqida izchillikni saqlaydi.

9-modda amalda xodim va ish beruvchi o‘rtasidagi vaqt jihatidan noaniqliklarni bartaraf etish, mehnat da’volarini yuritishda aniq muddatlarni hisoblash hamda huquqiy barqarorlikni ta’minlash uchun muhim vositadir. Shu tariqa, u mehnat qonunchiligining huquqiy mexanizmlarini yanada izchil va shaffof qiladi.

Yangiyo‘l shahar adliya bo‘limi

YXKM rahbari SH.Ro‘ziyeva