Янгиликлар

Kameral tekshiruv qachon o‘tkaziladi?

Kameral tekshiruv qachon o‘tkaziladi?

Kameral soliq tekshiruvi soliq idorasi tomonidan hujjatlar va axborot tizimlari asosida masofadan turib o‘tkaziladigan tekshiruvdir. Soliqlarni o‘z vaqtida to‘lash bu tekshiruvdan butunlay ozod etmaydi, chunki qaror ma’lum belgilar aniqlanganda qabul qilinadi.

Birinchidan, soliq xavfini boshqarish tizimi dalillarga ko‘ra qonun buzilishi xavfi bor degan xulosaga kelsa, kameral tekshiruv tayinlanishi mumkin. Ikkinchidan, soliq to‘lovchi taqdim etgan deklaratsiya va hisobotlarda hisob-kitob xatosi yoki ma’lumotlar o‘rtasida tafovut topilsa, shu asosning o‘zi tekshirish uchun yetarli bo‘ladi. Bundan tashqari, jismoniy yoki yuridik shaxslar murojaatida aniq qonunbuzarlik holatlari ko‘rsatilgan bo‘lsa, yoki avval berilgan hisobotga nisbatan soliq summasini kamaytiruvchi yoki zararni oshiruvchi aniqlashtirilgan hisobot taqdim etilsa, soliq organi kameral tekshiruv o‘tkazishga haqli.

Amaliyotdan misol. Masalan, QQS deklaratsiyasida sotuv aylanmasi sizning bojxona yoki bank ma’lumotlaringiz bilan mos kelmadi. Yoki siz aniqlashtirilgan hisobot yuborib, avvalgiga qaraganda soliq summasini pasaytirdingiz. Bu holatlar vaqtida to‘lov bo‘lgan taqdirda ham kameral tekshiruvga asos bo‘ladi. Odatda bunday tekshiruv idoradan chiqilmasdan o‘tkaziladi, natija bo‘yicha xabarnoma yuboriladi va sizdan izoh, tuzatish yoki qo‘shimcha hujjat talab qilinishi mumkin.

Normativ asos: 07.01.2021 yildagi 1-son qaror bilan tasdiqlangan “Soliq tekshiruvlarini tashkil etish va o‘tkazish tartibi to‘g‘risida”gi Nizom, 21-band.

Oqqo‘rg‘on tumani Adliya bo‘limi

Yuridik xizmat ko‘rsatish

markazi boshlig‘i                                                B.B.Mavlanov